الدكتور والاعلامي باسم يوسف مقدم برنامج "البرنامج" رد على الهجوم الشديد اللي شنه عليه الشيخ أبو إسلام أحمد عبد الله، في برنامجه "حزب الله" على قناة الأمة واللي دافع فيه عن الشيخ خالد عبد الله اللي انتقده باسم يوسف في حلقته اللي فاتت ، وقال باسم بسخرية: "فجأة بقيت خايف على نفسي من الفتنة"، وأضاف في تغريدة أخرى "مع أني طول عمرى فاكر إني شبه عائشة الكيلاني لكن سعيد بأن فيه شيوخا عندها فانتازيا عني وليلى علوي".
وكتب كمان باسم يوسف على صفحته على تويتر"الفيديو ده يثبت قد إيه إنتوا كنت بتظيطوا في موضوع جواز القاصرات. قاصرات مين؟ الذكور تخاف على نفسها. اتنقب ياد". وقال كمان "ضحكت على الفيديوهات دي واكتأبت بعديها. في النهاية هؤلاء يشوهون دين ربنا. ماتستغربوش من كتر أعداد المجاهرين بالردة قريبا".
وكان الشيخ أبو إسلام وجه رسالة لباسم يوسف، وقال ليه في برنامجه أمبارح "العلماء لهم هيبة ولازم احترام الهيبة دي، والله خص العلماء بأنهم يوجهوا الناس للصواب والخطأ". ووصف أبو إسلام طوال الفقرة باسم يوسف بـ"سافل يوسف"، ومقالش ابدا اسم باسم ، وقال الشيخ: "خد راحتك، إحنا مش بنتدخل لما تكون قليل الأدب مع غيرنا لأنهم أحرار، وإحنا مش لسان غيرنا، لكن لما تيجي ناحيتنا لا"، وبدأ الشيخ أبو إسلام في الدفاع عن الشيخ خالد عبد الله، وقال أنه رجل محترم، وقال لباسم "إنت لازم تلم نفسك".
وقال أبو إسلام لباسم: "كلم الحاجة الكبيرة، هي مش موافقاك وكلمت حد من أصهارك وقالت لهم باسم زودها حبتين"، وأكمل الشيخ: "طب إسأل بنتك مي، أو إسأل زوجتك لأنها في حوار في مكان عام وجهت لها إمرأة أخرى كلام كبير أوي"، وأضاف له "الناس اللي حواليك مش بيحبوك". وأمر الشيخ أبو إسلام باسم يوسف أنه يغطي وشه ويلبس نقاب وفقا للشرع، مبررا كلامه بأن باسم "واد حليوة"، وطلب منه أن يحط صورته جنب صورة ليلى علوي أو إلهام شاهين أو أي ممثلة، ونشوف "مين الأحلى"، وده اللي عمله مخرج الحلقة وحط صورة باسم يوسف جنب صورة ليلى علوي بالفعل.
ليست هناك تعليقات:
إرسال تعليق